కొత్తిమీర, పుదీనా, టొమాటో చట్నీ

టొమాటోలు - 4, శుభ్రపరిచిన కొత్తిమీర - అర కప్పు, పుదీనా - పావు కట్ట, మినప్పప్పు - అర టీస్పూన్, జీలకర్ర - పావు టీ స్పూన్, పచ్చిమిర్చి - 2, ఉప్పు - రుచికి సరిపడా, నూనె - టేబుల్ స్పూన్,

పోపు కోసం:
నూనె - టీ స్పూన్, ఆవాలు - అర టీ స్పూన్, ఎండుమిర్చి - 1, ఇంగువ - చిటికెడు, కరివేపాకు - రెండు రెబ్బలు,

తయారి:
1. పాత్రలో రెండు టీ స్పూన్ల నూనె వేడయ్యాక, జీలకర్ర వేయించాలి. దీంట్లో మినప్పప్పు ఎరుపు రంగు వచ్చేలా వేయించి, పచ్చిమిర్చి, కొత్తిమీర , పుదీనా కలిపి 2 నిమిషాలు వేయించి తీయాలి.

2.అదే పాన్‌లో మిగతా నూనె వేడయ్యాక టొమాటో ముక్కలు వేసి 8 నిమిషాలు వేయించి తీసి చల్లార్చాలి.

3.ముందుగా మినప్పప్పు మిశ్రమం గ్రైండ్ చేసి తరవాత వేయించిన టొమాటో ముక్కలు, ఉప్పు కలిపి గ్రైండ్ చేసి పాత్రలోకి తీయాలి.

4.పాత్రలో టీ స్పూన్ నూనె వేడయ్యాక ఆవాలు చిటపటలాడాక ఎండుమిర్చి, కరివేపాకు వేసి వేయించి చివరగా ఇంగువ కలిపి తీసి వెంటనే పచ్చడి మిశ్రమంలో కలపాలి.

Read More

జీరా పులావ్

కావలసినవి

బాస్మతి బియ్యం - కప్పు, నీరు - ఒకటిన్నర కప్పులు, జీలకర్ర - ఒకటిన్నర టీ స్పూను, నెయ్యి - టేబుల్ స్పూను, నూనె -టేబుల్ స్పూను, బిరియానీ ఆకు - 1, ఏలకులు - 4, లవంగాలు - 4, దాల్చిన చెక్క - చిన్న ముక్క, ఉప్పు - రుచికి సరిపడినంత, కొత్తిమీర తరుగు - టీస్పూను, ఉల్లిచక్రాలు - 6

తయారి
బియ్యాన్ని శుభ్రంగా కడిగి తగినంత నీరు పోసి సుమారు ఒక గంటసేపు నాననివ్వాలి. స్టౌ మీద బాణలి ఉంచి అందులో నెయ్యి, నూనె వేసి కాగాక అందులో జీలకర్ర, బిరియానీ ఆకు, ఏలకులు, దాల్చినచెక్క, లవంగాలు వేసి వేగాక, బియ్యం, ఉప్పు వేసి బాగా కలిపి నీరు పోయాలి. మూత పెట్టి, సన్నని సెగ మీద ఉడికించి దింపేయాలి. కొత్తిమీర తురుము, ఉల్లి చక్రాలతో గార్నిష్ చేసి వేడివేడిగా సర్వ్ చేయాలి.

వెజిటబుల్ కుర్మా

కావలసినవి:
క్యారట్ - 2, బంగాళదుంపలు - 6 (మీడియం సైజువి), బీన్స్ - 6, పచ్చిబఠాణీ - అర కప్పు, క్యాలీఫ్లవర్ - కొద్దిగా (పువ్వులుగా కట్‌చేసినవి 6), పచ్చికొబ్బరి తుమురు - 150 గ్రా., గసగసాలు - 25 గ్రా., జీడిపప్పు - 25 గ్రా., నూనె - నాలుగు టేబుల్ స్పూన్లు, ఉల్లిపాయలు - 3 (సన్నగా తరగాలి), పచ్చిమిర్చి తరుగు - మూడు టీస్పూన్లు, టొమాటో తరుగు - పావుకప్పు, కరివేపాకు - రెండు రెమ్మలు, అల్లం వెల్లుల్లి పేస్ట్ - టేబుల్ స్పూను, పసుపు - చిటికెడు, మిరప్పొడి - రెండు టీ స్పూన్లు, ధనియాలపొడి - రెండు టీ స్పూన్లు, జీరా పొడి - టీ స్పూను, ఉప్పు - రుచికి తగినంత, ఏలకులు - రెండు, దాల్చినచెక్క - చిన్న ముక్క, లవంగాలు - నాలుగు, కొత్తిమీర - చిన్నకట్ట, గరంమసాలాపొడి - అర టీ స్పూను, గసగసాలు - టీ స్పూను

తయారి:
పచ్చికొబ్బరి తురుము, గసగసాలు, జీడిపప్పులను మిక్సీలో వేసి మెత్తగా పేస్ట్ చేసి పక్కన ఉంచుకోవాలి. కూరగాయముక్కలను ఉడికించి పక్కన ఉంచుకోవాలి. బాణలిలో నూనె వేడి చేసి, అందులో ఉల్లితరుగు, పచ్చిమిర్చి తరుగు, మసాలా దినుసులు కరివేపాకు, పసుపు, అల్లం వెల్లుల్లి పేస్ట్, జీరాపొడి, మిరప్పొడి, ధనియాలపొడి వేసి కొద్దిగా వేగాక, ముందుగా పేస్ట్ చేసి ఉంచుకున్న పచ్చికొబ్బరి మిశ్రమాన్ని వేసి నూనె తేలేవరకు వేయించాలి. తరవాత కొద్దిగా నీరు, టొమాటో ముక్కలు వేసి బాగా కలపాలి. ఆ తరవాత ఉడికించుకున్న కూరముక్కలు, ఉప్పు, గరంమసాలా వేసి గ్రేవీ చిక్కబడే వరకు ఉడికించి దించేయాలి. చివరగా కొత్తిమీర తరుగుతో గార్నిష్ చేసి వేడివేడిగా సర్వ్ చేయాలి.

Read More

దహీ వడ

వడకు కావలసినవి:

మినప్పప్పు - రెండు కప్పులు, ఉప్పు - రుచికి తగినంత, నూనె - వేయించడానికి సరిపడా,

దహీకి కావలసినవి

పెరుగు - లీటరు, వేయించిన జీరాపొడి - టీ స్పూను, మిరప్పొడి - టీ స్పూను, ఉప్పు - రుచికి తగినంత, పంచదార - రెండు టేబుల్‌స్పూన్లు, అల్లం తురుము - టీ స్పూను, కొత్తిమీర - చిన్న కట్ట

తయారి

ముందురోజు రాత్రి మినప్పప్పును నానబెట్టాలి. మరుసటి రోజు గ్రైండర్‌లో వేసి మెత్తగా రుబ్బి, ఉప్పు కలిపి పక్కన ఉంచుకోవాలి. బాణలిలో నూనె కాగాక ఈ పిండిని చిన్నచిన్న గారెల మాదిరిగా ఒత్తి నూనెలో వేసి వేయించి తీసి నీళ్లలో వేసి ఒక నిముషం నాననిచ్చి తీసేయాలి. ఒక పాత్రలో పెరుగు వేసి చిక్కగా చిలకరించి, అందులో ఉప్పు, పంచదార, జీరాపొడి, మిరప్పొడి వేసి కలిపి, వేయించి ఉంచుకున్న గారెలను ఇందులో వేయాలి. కొత్తిమీర తరుగు, అల్లం తురుములను పైన చల్లాలి. చివరగా చింతపండు చట్నీ, పుదీనా చట్నీలతో గార్నిష్ చేసి చల్లగా సర్వ్ చేయాలి.

Read More